३० शासकीय, १७ अनुदानित आश्रमशाळा आणि १६ शासकीय वसतिगृहांमध्ये उपक्रम; विद्यार्थ्यांना व्यसनमुक्तीची सामूहिक शपथ
जव्हार, दि. २३ सप्टेंबर २०२६ : व्यसनमुक्त आणि सुदृढ समाजनिर्मितीसाठी भावी पिढीमध्ये जनजागृती निर्माण करण्याच्या उद्देशाने आदिवासी विकास आयुक्तालयाच्या निर्देशानुसार सुरू असलेल्या ‘सेवा संकल्प अभियान’ अंतर्गत एकात्मिक आदिवासी विकास प्रकल्प, जव्हारच्या कार्यक्षेत्रातील आश्रमशाळा आणि वसतिगृहांमध्ये ‘व्यसनमुक्त समाज व सुदृढ आरोग्य जनजागृती उपक्रम’ राबविण्यात आला.
या उपक्रमांतर्गत ३० शासकीय आश्रमशाळा, १७ अनुदानित आश्रमशाळा आणि १६ शासकीय वसतिगृहांमध्ये विविध जनजागृती कार्यक्रम घेण्यात आले. १७ सप्टेंबर ते १७ ऑक्टोबर २०२६ या कालावधीत सुरू असलेल्या सेवा संकल्प अभियानातील या उपक्रमात विद्यार्थी, मुख्याध्यापक, अधीक्षक, शिक्षक, शिक्षकेतर कर्मचारी आणि वैद्यकीय अधिकाऱ्यांनी मोठ्या संख्येने सहभाग घेतला.
व्यसनांच्या दुष्परिणामांबाबत विद्यार्थ्यांना मार्गदर्शन
आश्रमशाळा आणि वसतिगृहांमध्ये आयोजित विशेष सत्रांमध्ये तंबाखू, गुटखा, सिगारेट, मद्यपान तसेच अमली पदार्थांच्या सेवनामुळे होणाऱ्या शारीरिक, मानसिक आणि सामाजिक दुष्परिणामांबाबत विद्यार्थ्यांना मार्गदर्शन करण्यात आले.
शिक्षक, वैद्यकीय अधिकारी आणि तज्ज्ञ मार्गदर्शकांनी व्यसनामुळे आरोग्यावर होणारी हानी, कौटुंबिक जीवनावर होणारे विपरीत परिणाम तसेच शिक्षण आणि भविष्यातील प्रगतीवर होणाऱ्या परिणामांची माहिती विद्यार्थ्यांना दिली.
‘व्यसनापासून दूर राहणे आणि निरोगी जीवनशैली स्वीकारणे हीच उज्ज्वल भविष्याची गुरुकिल्ली’, हा संदेश विविध उदाहरणांच्या माध्यमातून विद्यार्थ्यांपर्यंत पोहोचविण्यात आला.
विद्यार्थ्यांनी घेतली व्यसनमुक्तीची सामूहिक शपथ
भावी पिढी निर्व्यसनी, निरोगी आणि सक्षम घडावी, या उद्देशाने आश्रमशाळा आणि वसतिगृहांमधील विद्यार्थ्यांना आयुष्यभर कोणत्याही प्रकारच्या व्यसनाच्या आहारी न जाण्याची सामूहिक शपथ देण्यात आली.
तसेच स्वतःचे कुटुंब आणि परिसर व्यसनमुक्त ठेवण्यासाठी पुढाकार घेण्याचे आवाहन विद्यार्थ्यांना करण्यात आले.
प्रभातफेरीतून व्यसनमुक्तीचा संदेश
व्यसनमुक्त समाजाचा संदेश जनसामान्यांपर्यंत पोहोचविण्यासाठी विद्यार्थी आणि कर्मचाऱ्यांच्या सहभागातून विविध ठिकाणी प्रभातफेरीचे आयोजन करण्यात आले.
विद्यार्थ्यांनी व्यसनमुक्तीचे महत्त्व सांगणारे फलक हातात घेत घोषणांच्या माध्यमातून नागरिकांमध्ये जनजागृती केली. ‘व्यसनाला नकार, निरोगी जीवनाचा स्वीकार’ असा संदेश या उपक्रमातून देण्यात आला.
आरोग्य तपासणीसह निरोगी जीवनशैलीचे मार्गदर्शन
विद्यार्थ्यांच्या आरोग्याची काळजी घेत काही आश्रमशाळांमध्ये आरोग्य तपासणी शिबिरांचेही आयोजन करण्यात आले. तज्ज्ञ वैद्यकीय पथकांनी विद्यार्थ्यांची सामान्य आरोग्य तपासणी केली. यावेळी संतुलित आहार, वैयक्तिक स्वच्छता आणि नियमित व्यायामाचे महत्त्वही समजावून सांगण्यात आले.
या सर्वंकष उपक्रमामुळे जव्हार प्रकल्पाच्या कार्यक्षेत्रातील ३० शासकीय आश्रमशाळा, १७ अनुदानित आश्रमशाळा आणि १६ शासकीय वसतिगृहांतील विद्यार्थ्यांमध्ये व्यसनमुक्ती आणि आरोग्यविषयक जागरूकता निर्माण करण्यास मदत झाली.
विद्यार्थी आणि कर्मचाऱ्यांच्या उत्स्फूर्त सहभागातून ‘व्यसनमुक्त समाज, विद्यार्थ्यांची व्यसनमुक्तीची सामूहिक शपथ आणि सुदृढ पिढी’ या संकल्पनेला बळ मिळाले.
