जिल्हा परिषद पालघरच्या समाज कल्याण व आरोग्य विभागाचा संयुक्त उपक्रम
पालघर, दि. १७ सप्टेंबर २०२६ : जिल्हा परिषद पालघरच्या समाज कल्याण विभाग आणि आरोग्य विभागाच्या संयुक्त विद्यमाने ‘सेवा संकल्प अभियानांतर्गत’ वसई येथील श्रद्धानंद महिला मातोश्री वृद्धाश्रमात आरोग्य तपासणी शिबिराचे आयोजन करण्यात आले. या शिबिरात वृद्धाश्रमातील ३७ वृद्धांची आरोग्य तपासणी करण्यात आली.
सेवा संकल्प अभियानाच्या माध्यमातून समाजातील विविध घटकांपर्यंत आरोग्य सेवा पोहोचविण्याच्या उद्देशाने या शिबिराचे आयोजन करण्यात आले होते. यावेळी वृद्धांची आरोग्य तपासणी करून त्यांच्या आरोग्यविषयक स्थितीची माहिती घेण्यात आली. तसेच आवश्यक आरोग्यविषयक मार्गदर्शनही करण्यात आले.
विविध ठिकाणी आरोग्यविषयक उपक्रम
जिल्ह्यात राबविण्यात येत असलेल्या सेवा संकल्प अभियानांतर्गत आरोग्य विभागाच्या माध्यमातून विविध ठिकाणी आरोग्यविषयक उपक्रम राबविण्यात येत आहेत. या उपक्रमांच्या माध्यमातून गरजू आणि विविध सामाजिक घटकांपर्यंत आरोग्य सेवा पोहोचविण्यावर भर देण्यात येत आहे.
अधिकारी व कर्मचारी उपस्थित
या आरोग्य तपासणी शिबिरावेळी वृद्धाश्रमाच्या संचालिका दर्शना शेट्ये, वैद्यकीय अधिकारी डॉ. मधुरा जुनगरे, आरोग्य पर्यवेक्षिका दीपाली पावसकर, समुदाय आरोग्य अधिकारी शीतल खंदारे, आरोग्य निरीक्षक वेदांत राणे, आरोग्य सहाय्यक सुनील घोडके आणि आरोग्य सेवक विशाल चव्हाण उपस्थित होते.
