तांत्रिक तपास आणि गोपनीय माहितीच्या आधारे पालघर पोलिसांची कारवाई; लोखंडी हातोडा व मोटारसायकल जप्त
मनोर : कपड्यांच्या दुकानातील काऊंटरवरून झालेल्या वादाचे पर्यवसान एका व्यक्तीवर लोखंडी हातोड्याने हल्ला करण्यात झाले. खुनाच्या प्रयत्नाच्या या गुन्ह्याचा पालघर पोलिसांनी तांत्रिक तपास आणि गोपनीय माहितीच्या आधारे छडा लावत तीन आरोपींना अटक केली आहे. या कारवाईत गुन्ह्यात वापरलेला लोखंडी हातोडा आणि मोटारसायकलही पोलिसांनी जप्त केली आहे.
काऊंटरवरील वादातून हल्ला
पोलिसांनी दिलेल्या माहितीनुसार, २३ सप्टेंबर रोजी फिर्यादी हर्षनाथ ब्रह्मदेव तिवारी हे दांडीपाडा, बोईसर पूर्व येथे उपस्थित होते. त्यावेळी त्यांच्या दुकानाच्या शेजारील काऊंटरवर एका अनोळखी व्यक्तीसोबत त्यांचा वाद झाला.
यानंतर संबंधित व्यक्तीने आपल्या दोन साथीदारांच्या मदतीने तिवारी यांना मारहाण केल्याचा आरोप आहे. यावेळी एका आरोपीने लोखंडी हातोड्याने त्यांच्या डोक्यावर, डाव्या गालावर आणि कानावर वार करून गंभीर दुखापत केल्याचे पोलिसांनी सांगितले.
या घटनेप्रकरणी बोईसर पोलीस ठाण्यात भारतीय न्याय संहितेतील संबंधित कलमांनुसार खुनाच्या प्रयत्नाचा गुन्हा दाखल करण्यात आला होता.
तांत्रिक तपासातून आरोपींचा शोध
गुन्ह्याचे गांभीर्य लक्षात घेऊन पोलीस अधीक्षक यतिश देशमुख यांच्या मार्गदर्शनाखाली स्थानिक गुन्हे शाखा, पालघर आणि बोईसर पोलिसांचे स्वतंत्र तपास पथक तयार करण्यात आले.
तांत्रिक विश्लेषण तसेच गोपनीय माहितीच्या आधारे पोलिसांनी सुनिलकुमार जादूगर पहलवान (२८), हिमांशू राजेशकुमार मिश्रा (२६) आणि शुभम माताचरण दुबे (३०) या तिघांना अटक केली.
हातोडा आणि मोटारसायकल जप्त
पोलिसांनी आरोपींकडून गुन्ह्यात वापरलेला लोखंडी हातोडा तसेच मोटारसायकल जप्त केली आहे. या प्रकरणाचा पुढील तपास पोलीस उपनिरीक्षक नितीन नरके यांच्या मार्गदर्शनाखाली बोईसर पोलीस ठाण्यात सुरू आहे.
