पालकमंत्री गणेश नाईक यांच्या हस्ते शुभारंभ
पोलीस, वनरक्षक आणि सैन्य भरतीसाठी मोफत प्रशिक्षण सुविधांचा होणार विस्तार
मनोर : पालघर जिल्ह्यातील ग्रामीण आणि आदिवासी युवकांच्या स्वप्नांना नवी दिशा देण्याच्या उद्देशाने बिरसायत येथील शिवध्येय अकॅडमीच्या नवीन इमारतीचे भूमिपूजन शनिवार, १७ ऑक्टोबर रोजी मनोर येथील आंभाण परिसरात महाराष्ट्राचे वनमंत्री तथा पालघर जिल्ह्याचे पालकमंत्री गणेश नाईक यांच्या हस्ते करण्यात आले. या नवीन इमारतीमुळे पोलीस भरती, वनरक्षक भरती, सैन्य भरती आणि विविध स्पर्धा परीक्षांसाठी युवकांना दिल्या जाणाऱ्या विनामूल्य प्रशिक्षण सुविधांचा विस्तार होणार आहे.
आर्थिक परिस्थितीमुळे ग्रामीण आणि आदिवासी भागातील गुणवंत युवकांना स्पर्धा परीक्षांच्या तयारीपासून वंचित राहावे लागू नये, हा या उपक्रमामागील मुख्य उद्देश आहे.
भूमिपूजन सोहळ्याला मान्यवरांची उपस्थिती
या भूमिपूजन सोहळ्याला भाजप महाराष्ट्राचे माजी संघटनमंत्री रघुनाथ कुलकर्णी, डी. लिंक इंडिया लिमिटेडचे व्यवस्थापकीय संचालक तथा मुख्य कार्यकारी अधिकारी तुषार सिंघट, राष्ट्रीय स्वयंसेवक संघाचे जिल्हा संघचालक नरेश मराड, विक्रमगडचे आमदार हरिश्चंद्र भोये, बिरसायतचे संरक्षक परागभाई मेहता, उद्योजक श्रीराम दांडेकर, मुंबईच्या नगरसेविका सायली रघुनाथ कुलकर्णी, उद्योजक विमल केडिया आणि सरपंच गीता संजय धापशी यांच्यासह विविध क्षेत्रांतील मान्यवर उपस्थित होते.
भूमिदाते आणि डी. लिंक इंडिया लिमिटेडचे सहकार्य
या उपक्रमासाठी भूमिदाते लचमन झवेरी यांचे सहकार्य लाभले आहे. तसेच, नवीन इमारतीसाठी डी. लिंक इंडिया लिमिटेडने वास्तुदेणगीदार म्हणून योगदान दिले आहे.
बिरसायतचे संस्थापक संतोष शिवराम जनाठे आणि शिवध्येय अकॅडमीचे संस्थापक दिग्विजय कुमावत सर यांच्यासह संपूर्ण बिरसायत परिवाराने या उपक्रमासाठी पुढाकार घेतला आहे.
ग्रामीण आणि आदिवासी युवकांसाठी प्रशिक्षणाचे महत्त्वपूर्ण केंद्र
युवकांमध्ये शिस्त, आत्मविश्वास, राष्ट्रनिष्ठा आणि नेतृत्वगुण विकसित करून त्यांना स्वावलंबी बनविण्याचे ध्येय शिवध्येय अकॅडमीने ठेवले आहे. पोलीस, वनरक्षक आणि सैन्य भरतीसह विविध स्पर्धा परीक्षांसाठी विनामूल्य प्रशिक्षण उपलब्ध करून देण्याच्या माध्यमातून ग्रामीण भागातील युवकांना पुढे जाण्याची संधी मिळत आहे.
नवीन इमारतीमुळे प्रशिक्षण सुविधांचा विस्तार होऊन पालघर जिल्ह्यातील ग्रामीण आणि आदिवासी युवकांना स्पर्धा परीक्षांची तयारी करण्यासाठी अधिक सक्षम व्यासपीठ उपलब्ध होईल, अशी अपेक्षा व्यक्त केली जात आहे.
