वरई उड्डाणपुलाजवळील विचित्र अपघातात गंभीर जखमी; दोन दिवसांच्या उपचारानंतर प्राणज्योत मालवली
मनोर, दि. १६ सप्टेंबर २०२६ : मुंबई-अहमदाबाद महामार्गावरील पालघर तालुक्यातील वरई उड्डाणपुलालगत झालेल्या विचित्र अपघातात गंभीर जखमी झालेले महामार्ग वाहतूक विभागाचे पोलीस उपनिरीक्षक यादव बोराडे यांचा बुधवारी उपचारादरम्यान मृत्यू झाला. मिरा रोड येथील खासगी रुग्णालयात गेल्या दोन दिवसांपासून त्यांच्यावर उपचार सुरू होते. मात्र प्रकृतीत सुधारणा न झाल्याने बुधवारी दुपारी डॉक्टरांनी त्यांना मृत घोषित केले.
वाहन तपासणीदरम्यान घडला दुर्दैवी अपघात
सोमवारी सकाळी सुमारे १० वाजण्याच्या सुमारास हा दुर्दैवी अपघात घडला. महामार्ग वाहतूक विभागाच्या मनोर उपकेंद्रातील पथकाकडून वरई उड्डाणपुलाच्या सुरुवातीच्या भागात मुंबई वाहिनीवर वाहन तपासणी आणि पेट्रोलिंग सुरू होते. त्यावेळी पोलीस उपनिरीक्षक यादव बोराडे हे कर्तव्य बजावत होते.
भरधाव ट्रकचा टायर अचानक निखळला
उड्डाणपुलाच्या गुजरात वाहिनीवरील उतार आणि वळणाच्या ठिकाणी एका भरधाव ट्रकचा टायर अचानक निखळला. वेगाने घसरत आलेल्या या टायरने प्रथम मुंबई वाहिनीवरील एका ट्रकला धडक दिली.
त्यानंतर हा टायर महामार्गालगत पेट्रोलिंगसाठी उभ्या असलेल्या कर्मचाऱ्यांच्या दिशेने आला. घटना अचानक घडल्याने यादव बोराडे यांना बचावाची संधी मिळाली नाही. टायरचा जोरदार धक्का बसल्याने ते सुमारे पाच ते सहा फूट दूर फेकले गेले. या दुर्घटनेत त्यांच्या नाकातून आणि तोंडातून रक्तस्राव सुरू झाला.
प्राथमिक उपचारानंतर मिरा रोडला हलवले
घटनास्थळी उपस्थित कर्मचाऱ्यांनी तातडीने यादव बोराडे यांना मनोर येथील खासगी रुग्णालयात दाखल केले. प्राथमिक उपचारानंतर त्यांना पुढील उपचारासाठी मिरा रोड येथील खासगी रुग्णालयात हलविण्यात आले.
मात्र दोन दिवसांच्या उपचारानंतरही त्यांच्या प्रकृतीत सुधारणा झाली नाही. अखेर बुधवारी दुपारी डॉक्टरांनी त्यांना मृत घोषित केले.
महामार्ग वाहतूक विभागात हळहळ
महामार्गावर कर्तव्य बजावत असतानाच घडलेल्या या दुर्दैवी घटनेत महामार्ग वाहतूक विभागाने एक कर्तव्यदक्ष अधिकारी गमावला आहे. यादव बोराडे यांच्या निधनाने पोलीस विभागात हळहळ व्यक्त होत आहे.
